Քայլարշավը սկսվում է «Կանաչ տուն» հանգստյան գոտուց, որտեղից դեպի «Լաստիվեր անապատ» տանող մոտ 3,5 կմ անտառային արահետներով արշավը տևում է մոտ 4-5 ժամ (ներառյալ հիշյալ տարածքում զբոսանքը), իսկ ճանապարհին բացվող բնության գեղեցիկ տեսարանները գրավում են բնության սիրահարներին և էքստրեմալ զբոսաշրջիկներին, ովքեր պատրաստ են հաճելին համատեղել օգտակարի հետ։ Քայլարշավի ընթացքում զբոսաշրջիկները կարող են տեսնել Լաստիվերի տարածքում գտնվող քարանձավ-անապատը, Սառնաջուր գետը, գետի մեծ և փոքր ջրվեժները՝ անցնելով տավուշյան սաղարթախիտ անտառով։ Անտառում գտնվող քարանձավը տեղակայված է ձորի լանջին, որին հասնելու համար մարդիկ ստիպված կառուցել են գերաններից պատրաստված աստիճաններ և կառույցը նման է լաստի, այդ իսկ պատճառով, ըստ ավանդազրույցների՝ տեղացիները նշված վայրն անվանել են «Լաստիվեր»։ XIII-XIV դդ. մոնղոլական արշավանքների ժամանակ բնակչությունը թաքստոց է գտել քարանձավում: